Gericht Wenden/Zufallsfunde

• Schöffenprotokolle der Stadt Siegburg 1415-1662, Historisches Archiv der Stadt Siegburg, Sign. A II/1-31. Bearbeiter: W. Günter Henseler.
• A II/2, S. 279r [1508]: Johan (von) Wenden, Kesseljohengen und Johan Lynenwever, ouch van Wenden, synt allsament burg vur Heynen (von Wenden).
• A II/2. S. 286r [1510]: Kessel Johengen est obgenant van Heyn Neten van Wenden, Rutger Lodwichs van Ratingen zom Gryff impetit denselven Heynen vur X Gulden und III Albus heufftgeldes und synen schaden, und hait syne konde und kontschafft doen leesen. Heyn hofft, de lude neit goet genoch ensyn, eme synen eydt zo brechen, und sy solden ouch persoenlich vur gereichte erschynen. Der scheffen hait Rutger ervolgt gewyst. Heyn enkone dan bewysen, de getzuge neit zuichbar man ensy.
• A II/4. S. 25r [1537]: Item, Herman van Wenden und Greit, sin elige huisfraw, hant verkaufft und upgedragen mit hant, halm und monde einen irer beider garden, gelegen bussen der Holtzportzen, tuisschen Joenen erven und Starckenbergsch garden, vur heufft schuist up de straisse, sonder einich jairpacht geldende nemantz und dat Alff Becker und Lißgen, eluiden, iren erven, sich davan unterfft und vurgemelte eluden damit geerfft, as zo Siberch recht is.
• A II/7 1500 Bl. 226r: Loe et Dadenberch, anno domini XVC ipso die Cecilie. Dederich Schomecher, burger zo Bonne, hait gesaicht, dat hie vur veir jaren myt Rutger Lodwichs, burger zo Syberch, van Syberch sy gegangen bis zo Wenden, omb van syner swegerfrauwen etwys vehes zo overkomen. So have Rutger van eynme van Gewenden zo doen gehait, gnant Heyn ...[Leerstelle].... und sy hiemyt Rutger und Heynen vurscreven gegangen in eyn weese, umb eyn koe zo beseyn, die Heyn wolde an scholt geven, deme vurgenanten Rutger. Und as Rutger de koe besach, was de koe mager und stonde hatte ouch ander gebrech, so dat de koe Rutger neit anstendich was, dardurch, dat Rutger und Heyn sich zweyen wurden, umb dat Rutger geyne bezalonge konnte krygen. Darna is derselve Dederich wederumb zo Heynen gegangen und in der gutlicheit myt eme gereidt, umb de bezalonge van Rutgers wegen, so dat Heynen do eme eyn Kron gegeven haet. Und as Dederich myt der Kronen vur der dur was, sprach Heyn, lange weder her de Kronen, wannee dat ich eme dat eyne geve sall ich eme dat ander ouch wuell, doch haet he de Kroen Rutger braicht haet an bezalonge eyner mererer sommen, wilche somme sy ouch under sich gegroist haven. Und de groessong is Dederich neit kundich et hoc vult confirmarer juramento.